Deewaar
Scene #21 - Mere peechhe to sirf meri kismat hogi
Daavar anchors a meeting with his henchmen.
Mulk Raj Daavar:
Dubai se chala hua steamer hamara sona lekar kal theek gyaarah baje Varsova beach par pahunchega. Tum sab wahan honge. Vijay, Darpan, Kumar thode faasle pe honge. Chaaro taraf nazar rakhenge. Steamer ke wahan aate hi, Jaychand un logo ke paas jaayega aur yeh note ka phata hua tukda un logo ko dikhayega. Is note ka doosra tukda un logo ke paas hoga. Woh in dono tukdo ko milaake dekhenge aur sona Jaychand ke haath mein de denge.
Vijay Verma:
Daavar saahab, main ek baat kehna chaahta hoon. Jis kaam ke liye mujhe aapne rakha hai, wo kaam kaise kiya jaayega, yeh sochna bhi mera kaam hai.
Mulk Raj Daavar:
Main samjha nahi.
Vijay Verma:
Aapko sona chahiye. Woh hifaazat se aapke paas pahunch jaayega. Magar shart yeh hai ki yeh kaam sirf mujh par chhod diya jaay.
Mulk Raj Daavar:
Tum yeh kaam akele karna chaahte ho?
Vijay Verma:
Jee haan.
Mulk Raj Daavar:
Tum samajhte ho yeh kaam tum akele kar sakte ho?
Vijay Verma:
Jee nahi, main jaanta hoon ki main yeh kaam akele kar sakta hoon.
Mulk Raj Daavar:
OK. Main tumpe jua kheloonga. Yeh kaam tum akele karoge. Yeh lo. Lekin, khayaal rahe, ek taraf tumhare peechhe pulis hogi aur doosri taraf Saamant.