Deewaar
Scene #48 - Aashirwaad dene aaogi na Maa
At Vijay's hiding place.
Anita:
Vijay, tumhari maa achhi ho gayi, Vijay. Ab woh ghar pe hai.
Vijay Verma:
Maa achhi ho gayi?
Anita:
Haan.
Vijay Verma:
Maa achhi ho gayi! Yeh to tum bahut achhi khabar laayi, Anita. Ab mujhe koi fikar nahi, koi fikar nahi.
Anita:
Haan, Vijay.
Vijay Verma:
Ab, yeh lo. Let's celebrate. Come on. Cheers... Cheers?
Anita:
Tum piyo, Vijay.
Vijay Verma:
Kyon? Tum nahi piyogi?
Anita:
Maine sharaab chhod dee hai.
Vijay Verma:
Kyon?
Anita:
Vijay, main maa banne waali hoon, tumhaare bachche ki maa. Lekin main tumhe majboor nahi karoongi ki tum mujhse shaadi kar lo. Chaahe kuchh bhi ho, main is bachche ko janam doongi aur koshish karoongi ki apne bachche ko ek aisi zindagi de sakoo jo meri zindagi se, tumhari zindagi se behtar ho.
Vijay Verma:
Main tumse shaadi karoonga, Anita, aaj, abhi. Aur uske baad apne aap ko kanoon ke hawaale kar doonga. Haan, Anita. Agar hame apne bachche ko ek behtar zindagi deni hai, to yeh qurbaani mujhe deni hogi, apne gunaaho ka praayaschit. Main nahi chaahta ki, main nahi chaahta ki kal mere bete ke haath pe koi likh sake ki iska baap chor hai. Yeh kya, Anita?
Anita:
Arey! Aaj yeh aansoo kaise baahar nikal aaye?
Vijay Verma:
Chalo, Anita. Hum abhi mandir jaayenge.
Anita:
Vijay! Tum, tum thodi der mera intezaar karoge? Main abhi ghar jaakar aati hoon. Meri maa ne meri shaadi ke liye jo saadi dee thi, maa to nahi rahi, lekin woh sapna aaj bhi mere paas amaanat ki tarah hai. Main jaaoo?
Vijay Verma:
Jaao, Anita. Main tumhaara intezaar karoonga.
Anita:
Vijay! Ahh!
Vijay goes to make a 6 digit telephone call.
Phone rings at Ravi's house. Mother picks it up.
Sumitra Devi:
Hello.
Vijay isn't able to speak for a while.
Sumitra Devi:
Kaun bol raha hai?
Vijay Verma:
Maa.
Sumitra Devi:
Vijay!
Vijay Verma:
Kaisi ho, maa? Maa, main mandir aa raha hoon, maa. Tumhara aashirwaad chahiye, maa. Uske baad jo tum khogi, wohi hoga. Aashirwaad dene aaogi na, maa?
Sumitra Devi:
Aaoongi, zaroor aaoongi.
Vijay Verma:
Maa... Maa, tum...
Vijay isn't able to complete his sentence and puts down the phone.